Anadili
بیر خورداد قیامی نین ایلدونومو
مای آیی نین 25 ده شنبه گونو کولن شهری نین ان بویوک کلیساسی اؤلان دومون قارشی سیندا میللتی میزین تاریخی قیامی قئید ئدیلمیشدیر. بو قئید ائتمه مراسیمینده او گونده جانلارینی وطن اوچون قوربان وئره ن وطنداشلارمیزین شکیللریله یاناشی ، آذربایجانیمیزدا اولان سیاسی توتوقلولارین شکیل لریده سرگیلنمیشدیر.وطنیمیز آذربایجانین اوچ رنگلی بایراغی نین اولماسی و ایران آدلانان یئرین اورادا آدی نین کئچمه سی دیقتی چکمیشدیر. بورادا مستملکه ده اولان وطنیمیزین حاقیندا ، سیاسی توتوقلولاریمیز و بیر خورداد قیامی حاقدا آلمانلیلارا آلمان دیلینده معلومات وئریلیمیشدیر
آچیقلاما
بوگون آلمانیانین کولن شهرینده چوخ سایدا یورداشیمیزین قاتیلماسیله بیرخورداد قیامینین ایل دونوموو قئید اولوندو .
تداروک کومیته سی اولاراق، بوتون سویداشلاریمیزدان خصوصن اوزاق یوللاردان گه لیب قاتیلانلارا منتدارلیغینی بیلدیریر.
بوگون مراسیمده اوخونان قطنامه:
بیر خوردادقیامی
خانیملار و بئی لر:
یوز ایله یاخیندیرکی گونئی آذربایجانیمیز بعضی دولتلرین چیخارلارینی قوروما ایله بیرلیکده فارس ایرقچی لیغیتا ( نژاد پرست لی یینه ) آرخالانان تئهران رئژیمی نین مستعمره سینه چئوریلمیشدیر..
تهران رئژیمی بوتون ایمکانلاری ایله بوگونه قده ر آذربایجان نین موجودییتینی و تورک میللتینین وارلیغینی انکار ائتمه یه چالیشیب ، چالیشماقدادیر.
سوزده دولت اولاراق اینسان حاقلارینین بیاننامه سینه قول چکسه ده چیخارجی دولتلره آرخالاناراق ، بوتون طبیعی حاقلاریمیزی الیمیزدن آلماقا جهد گوسترمیش، تاریخ ، مدنیت و دیلیمیزی داناراق، بیزی بیز اولاراق یوخ، اوزلرینین فاشیست ذئهنیتینده ن دوعان بیر کیچیک قوم کیمی گوسترمه یه چالیشیرلار، اولکه میزی تالان ائده ره ک بوتون یئر آلتی ویئر اوستو میللی سرمایه لریمیزی فارس بولگه لرینه آختاریرلار، پیلانلی بیر شکیلده میللتیمیزین سرمایه ، بئیین و ایش گوجونو ن فارس بولگه لره گوچورتمک اوچون زمین حاضیرلایرلار، بوتون مئدیا آراجلاریندان یارارلانیب ، میللتیمیزی جاهیل ، آنلاماز ، گئریجی گوستریرلر. باشقا سوزله دئسک اوز آدلارینی ، خصوصییتلرینی بیزه مال ائتمه یه چالیشیرلار. دیل و کولتوروموزه قارشی آغیر تحقیرلر ائدیرلر. بونلار بس دئیلمیش کیمی 2006 نجی ایلده دولتین رسمی اورقانی اولان « ایران »آدلی قزه ته ده تحقیر ائدیجی بیر کاریکاتور ایله ان چیرکین و غیر اینسانی شکلیده میللتیمیزه بویوک بیر اهانتده بولوندولار. حقیقی اوزلرینی گوسته ره ره ک میللی وارلیغیمیزین نئجه یوخ ائتمک ایسته دیکلرینی اوتانمازجاسینا یاینلادیلار!!
بو آرتیق میللتیمیزین صبرینین کاساسینی داشیردی ! 1 خورداددا میللتیمیز ان مدنی شکیلده گوستردی کی، کیمسه بیزیم میللتین منلی ینی تاپدالایّب و تحقیر ائده بیلمه ز ، میلیونلارجا اینسان خیاوانلاراـ کوچه لره توکوله ره ک هارای ، هارای من تورکم دییه رک، اوز وارلیغینا صاحیب چیخدیلار. بئله لیکله بیر عصره یاخین چیخارجی دولتلرین و ایرقجی فارس حاکمییتین انکار و آسیمیلاسیون سیاستلرینی بوشا چیخارتدیلار.
اوگون اونلارجا شهید ، یوزلرجه یارالی وئریب و مینلرجه توتوقلانسادا ، بیر داها دونیایا گوستره بیلدیک کی، تومروس آنا ، بابک آتا ، ستارخان ،خیابانی اولادلاری وار اولدوقجا آذربایجانیمیزی یوخ ائتمک مومکون دئییلدیر. یاشاییب و یاشایاجاقدیر.
بیر خورداد قیامی بو آچیدان باش وئره ن قیاملار ایچینده خصوصی بیر موقعییته صاحیبدیر،باشقا قیاملار ساده جه استبدادا قارشی اولوب ، دموکراتیک ایستک لره آغیرلیق وئرسه ده ، خورداد قیامی دئموکراتیک ، اجتماعی عدالته دایالی سجیه وی بیر ماهیت داشیر، بوقیامین آماجی اوز مقددراتیمیزی اوز الیمیزه آلماق و او اولکه ده اینسان حاقلارینا دایالی ، چاغاش (مدرن) ،و اجتماعی عدالتلی دولت یاراتماقدیر..
هئچ شبهه سیز بو قیام دونیا و اوزللیکله آذربایجان تاریخینده قیزیل بیر صحیفه اولاراق قالاجاق آزادلیق میز یولوندا آپاریلان موباریزه میزه ایشیق ساچاجاقدیر.
دوشمن بونو بیلمه لیدیرکی، اودلاریوردونداکی بو اودو سونمه یه جک وقهرمان اولادلاری مستملکه چی فارس رئژیمینین بوتون باسقی ، تئرور، دوسداق و اعداملارا باخمیاراق اوز فعالیتلرینی قورتولوشا اولاشانا قدره ر دوام اتدیره جک لر
بیزیم بو شانلی قیامدان چیخاردیغیمیز درس لر ایسه بونلاردان عبارتدیر:
1- میللی چیخارلاریمیزی ، شخصی و تشکیلات چیخارلاریندان اوستون توتمالی ییق.
2-رئژیمین منسوبلاری نین دوست آدینا آرامیزا گیریب، زامانسیز و گئره کسیز اختلاف یارادان و بیرلیگیمیزی بوزان موضولاری اورتایا آتمالارینا ایمکان وئرمه مه لی ییک
3- بو بیر میللی داوادیر، کیمسه اوزون و تشکیلاتینی میللتیمیزین تک سه سی کیمی گورمه مه لیدیر
4- میللی چیخارلار و بین الملل قوروملار ، آذربایجان تشکیلاتلارینی پارجالانمیش یوخ ، بلکه بیرچاتی آلتیندا توپلانما لارینی گورمک ایستر.
5- بوگون کیچیک شخصی و یا خود ایدئولوژیک داوانین نه زامانی و نه یئریدیر ، قورتولوش داوامیز بیزده ن بیرلیک و برابرلیگی ایسترییر.
6-دونه نه قده ر بیربیرینین قانین توکن دشمن ، تشکیلات و قوروملار اوز میللی چیخارلاری اوچون ایش بیرلیگینه گئدیرکن ، بیزیم ایچیمیزده اولان پارچالانمالار ، بیر داها توپراقلاریمیزی ایتیرمک، و میللتیمیزین یوخ اولماسی دئمکدیر!
7- صاباح اوز مقددراتیمیزی الیمیزه آلدیغیمیزدا طبیعی دیرکی ، مدرن و چاغداش آذربایجاندا هر بیر فیکیر صاحیبی، فرقلی گوروشلو تشکیلاتلار، قانون چرچیوه سینده اوزلرینین فیکیرلرینی آچیقلاییب ، میللتین سه سینی آلماق اوچون مدنی مبارزه ائده جکدیر.آما بوگون اونون واختی دئییلدیر.
8- بین الملل حقوق و فعال دیپلماسی یوروتمک و میللی چیخارلاریمیزی قوروماق اوچون ، تک مرکزلی ،میللی اراده نی حقیقتن تمثیل ائدن بیر گوجلو و ایش بیلن تیمه احتیاج وار، بودا تشکیلاتلارین بیر آرایا گئلمه لری ایله اولا بیله ر.
9- بیزیم داوامیز اینسانی و بین الملل حقوقا دایالیدیر، یئرسیز حرکتلرله حقلی اولوغوموز حالدا ، حقسیز دوروملارا دوشمه مه لی ییک.اونوتماماق لازیمدیر کی، بیز ایرقچی ـ راسیست، دیکتاتور، فوندامنتالیست گئریچی بیر رئژیمه قارشی موباریزه آپاران آزادلیق و اینسان سئوه ر بیر میللت یک. .
یاشاسین بیرخورداد قیامی نین خاطیره سی
یاشاسین آذربایجان
وار اولسون ، بیرلیک و برابرلیگیمیز
25.05.2013
